Google Analytics

Wednesday 4 February 2015

زيارة السيسي للاقباط في عيد الميلاد

7 يناير 2015

بكل هدوء و عقل، ممكن حد يفهمني ايه الفرق بين حركة السيسي بتاعة قداس العيد (اللي متفقين انها حركة كويسة) و اي حركة تانية عملها زي حركة بوكيه الورد إياه و حركة العجلة الشهيرة اللي عملهم بعد الانتخابات؟؟
يا ريت نهدي كده و نفكر ايه المكاسب الحقيقية من الحركات دي؟؟
هل مثلا احنا كنا مستنيين اعتراف من جلالة الرئيس اننا عندنا مشاكل تحرش و مواصلات و احتقان طائفي و مشكلة مواطنة عشان نحل المشاكل دي بشوية حركات شيك و لا المطلوب خطط و افعال علي ارض الواقع عشان نحل المشاكل الواضحة دي؟؟
من الاخر، اي حركة من الحركات دي بتعمل نوع من انواع الفرحة الزائدة عند قطاع كبير من الناس عايشة باقتناع دفين ان الرئيس ده حاجة كبيرة قوي و شايفاه كملك و هما رعاياه و هو عارف كده كويس و بيعمل الكام حركة دول عشان يحافظ علي شعبيته اللي بتقل عند بعض الناس لإنه مش بيحل جذور المشاكل.
انا بقي بعامل السيسي و هعامل اي رئيس يجي بعده كموظف عند الشعب و دوره خدمة الشعب مش كملك يمن بالمنح و العطايا علي رعاياه. فيه فرق كبير قوي بين الحالتين و عشان كده نفسي ياخد اي قرار او يعمل اي حاجة مفيدة في اي مشكلة في البلد و مش بتأثر خالص بالحركات دي عشان جربناها كذا مرة قبل كده و شوفنا انها مش بتحل اي حاجة غير انها بتعمل شوية فرحة وقتية لشوية ناس زي اللي بيشرب مخدرات عشان ينبسط لفترة صغيرة و بعد كده مفعول المخدر بيروح و يرجع للواقع و كإنه عايز يهرب من الواقع لفترة صغيرة و ده قمة الاحباط من وجهة نظري.
يا ريت السيسي يثبت اني غلط و نشوفه بياخد قرارات تحل اي مشكلة حقيقية في البلد زي التعليم و الصحة و الاحتقان الطائفي و المواطنة و الفساد و غياب العدل.

No comments:

Post a Comment