Google Analytics

Tuesday 3 February 2015

تزوير في اوراق رسمية عشان منظرنا قدام الاجانب

6 ديسمبر 2014

"محاولة إدعاء إن اعتقال مرسي كان لسبب جنائي وسجنه عند الداخلية شئ مثير للضحك ومالوش لازمة. مصر كلها عارفة إنه كان معتقل عند الجيش ودة كان لازم يحصل ومالوش بديل تانى والا كان يبقى عندنا رئيسين ، كمان المكالمة تدل على ان النيابة غير مستقلة وان القضاء مستقل."
ده كان رد مواطن مصري طبيعي فاهم اللي بيحصل حواليه بخصوص التسريب الخاص بممدوح شاهين عن تزوير الأوراق الرسمية بخصوص ظروف اعتقال مرسي و مش شايف إن التسريب ده فيه أي مشكلة و اعتقد إن النموذج ده منتشر جدا في كل حتة بين مؤيدين النظام اللي شايفين نفسهم واقعيين.
أنا شخصيا معترض على جزء بسيط من كلامه ده اللي بيقول فيه إن القضاء مستقل و دي جملة من وجهة نظري غلط تماما و الدليل إننا مسمعناش عن أي واحد ينتمي للقضاء فتح بقه بأي كلمة على التسريب بتاع ممدوح شاهين و أنا شايف إن أكتر حاجة منطقية في كلام ممدوح شاهين إن كل التزبيطات دي هدفها تستيف الاوراق في حالة إن أي جهة اجنبية حبت تبعت أي لجنة تقصي الحقائق بخصوص ملابسات القبض على مرسي. أو ممكن يكون التسريب ده تمهيد لخروج مرسي من السجن (و لكني استبعد هذا الاستنتاج).
الخلاصة إن فيه ناس شايفة إن التسريب حقيقي و معندهمش ادنى مشكلة في محتوى التسريب وشايفة إن تلفيق الاوراق أو تزويرها ضرورة لابد منها و أنا شايف إن الناس دي عندها سلام داخلي طبيعي و ده كان واضح في طريقة كلام ممدوح شاهين نفسه و هو بيتكلم على التزوير في الاوراق بطريقة طبيعية و كأنه بيتكلم على اجراء عادي مفيهوش أي مشكلة.
أنا شخصيا مش مستغرب من الاسلوب ده اللي اصبح اسلوب حياة موجود في حياة أي إنسان مصري (أهم حاجة يكون المظهر الخارجي شكله كويس ومش مهم الداخل شكله إيه) و المواقف اللي من النوع ده بتفكرني بموضوع بيحصل كتير في شركات كتير ماشية بالبركة و لسبب ما بتحتاج تحصل على أي شهادة من شهادات الجودة.
اللي بيحصل عشان أي شركة تحصل على شهادة جودة زي ISO مثلا, لازم تمشي على كتالوج من الاجراءات اللي بتحددها الجهة المانحة للجودة و لو أي حد عرف الاجراءات دي, هيلاقي إنها اجراءات منطقية جدا و هدفها هو التأكد إن المنتج النهائي للشركة منتج يحمل الجودة المطلوبة.
فيه شركات كتير ماشية من غير نظام محدد و بتكون حاسة إن مفيش أي مشكلة عندها بس عشان تعرف تبيع منتجاتها أو خدماتها, لازم تحصل على شهادة جودة و بتضطر تمشي على النظام اللي حطاه الجهة المانحة لشهادة الجودة.
في معظم الأحيان, الشركات اللي معندهاش نية تصلح أي حاجة من اسلوب شغلها بتظبط الورق وكإن الشركة ماشية بالنظام المظبوط عشان لما يجي أي مفتش من الجهة المانحة لشهادة الجودة, يلاقي إن كل حاجة زي الفل و يا دار مادخلك شر. طبعا الجهات المانحة لشهادات الجودة بتكون عارفة الاسلوب ده و بيكون ليهم طرقهم عشان يشوفوا الغلطات حتى لو الورق متستف بطريقة شكلها كويس بس برضه بنلاقي شركات بتحاول تتحايل على ده وتعمل كإنها ماشية صح وهي في الواقع ماشية من غير أي نظام و الجميل في المواقف دي إن الموظفين اللي في الشركات دي بيكونوا عارفين إنهم بيكدبوا و بيزوروا في الاوراق وشايفين إن دي ضرورة لا بد منها عشان ناخد شهادة الجودة و الشركة تستفيد.
الحقيقة من وجهة نظري إن شهادات الجودة هي مهمة و مفيدة جدا لو أي شركة مشيت عليها بطريقة صح و النتائج بتكون هايلة جدا, بس لو أي شركة عندها شهادة الجودة من غير ماتمشي على الاجراءات الصح, بنلاقي إنها بتعاني جدا في تظبيط الاوراق و دايما بتكون النتائج سيئة للغاية.

No comments:

Post a Comment