Google Analytics

Wednesday, 4 February 2015

قواعد الهجرة الأربعون لكندا

12 يناير 2015

معروف تماما إن هوجة الهجرة شغالة على ودنه في مصر و كل الناس اللي أعرفهم تقريبا عايزين يطفشوا من مصر و طبعا كندا من أكتر البلاد اللي ناس كتير بتحاول تهاجر ليها خاصة إن الشيخ حسين يعقوب قال للّي مش عاجبه, يروح كندا, و بما إني في كندا من فترة, احب أعرف الناس أكتر عن كندا على طريقة القواعد الاربعين المشهورة (أنا مش عارف هم ليه اربعين بس بما إن ده البروتوكول, فأنا هحترمه معرفش ليه برضه)
1. لما تفكر تهاجر لكندا, اسهل طريقة إنك تعرف إذا كان ينفع تهاجر ليها ولا لأ هو الموقع الرسمي للهجرة الكندية. صدقني بلاش تسمع أي كلام من أي حد عشان المصريين بيحبوا يفتوا كتير بأمارة "هو قال لك فين؟؟"
2. نصيحة لو مش عارف تطلع المعلومات من الموقع الرسمي, انصحك تفكر في أي بلد تانية.
3. المحامي اللي هيقولك إنه هياخد أي حاجة و يجبلك الهجرة ده نصاب و ابعد عنه أحسن.
4. بص, أنا عارف إنك عارف إن كندا برد بس متقلقش, الناس عايشة هناك عادي و الحياة ماشية طبيعي جدا.
5. لو إنت مبتعرفش فرنساوي, مظنش إن كام كورس في المركز الفرنسي هيخليك بتعرف تتكلم فرنساوي. خليك في المضمون و قدم على أي مقاطعة غير كيبيك
6. لما تاخد فيزا الهجرة إن شاء الله, حط في دماغك قبل ماتيجي إن الكنديين هنا مش فارق معاهم وصولك قوي و مش هيوزعوا عليك فلوس لما توصل. الانسان المصري بالنسبة لهم شخص عادي زي بقية الجنسيات مش زي ما بيقولوا في مصر.
7. كندا غالية و أي قرش جاي بيه من مصر حافظ عليه كويس و بلاش بعزقة الفلوس على حاجات ملهاش لازمة أول ما توصل. مش معنى إن ال 100 جنيه ملهاش قيمة إن ال 100 دولار زيها.
8. لو سافرت امريكا قبل كده, مش عايزك تفتكر إن كندا زيها و هتكتشف بعد شوية إن فيه فرق كبير بينهم.
9. أنا اعتقد إن أحسن وقت تيجي فيه هو الصيف عشان تاخد تغيرات الجو واحدة واحدة بدل ما تلبس السقعة من أول ضربة لو جيت في الشتا.
10. صدقني عارف إن الشتا بيكون سقعة بس متقلقش, كله بيعدي
11. لما تيجي تفكر تسكن فين, أي حد هتسأله يا اما هيقولك إن أحسن مكان هو المكان اللي ساكن فيه يا اما هيقولك ابعد عن المكان اللي ساكن فيه. أنا لو منك اخد أي حاجة مؤقتة في أي مكان و بعدين ادرس كل الاماكن في المدينة اللي إنت فيها و بعد كده قرر المكان اللي يريحك.
12. لو عايز تعيش في زحمة و دوشة, عليك و على أي مدينة كبيرة زي تورونتو أو مونتريال بس مظنش هتعجبك لو معاك عيال بس في الاخر دي مزاجات.
13. أهم حاجة أول ما توصل إنك تشتغل بسرعة. دي اصعب خطوة و ناس كتير بيجيلها اكتئاب في الفترة الاولى. معلش استحمل الفترة دي و أعمل حسابك من قبل ماتيجي إنك ممكن تشتغل أي حاجة في الاول لغاية ما تظبط أمورك في البلد.
14. أي حاجة هتشتريها في الاول زي موبايل أو انترنت, هتلاقي باقات كتير و الفروقات بينهم مش كتير في السعر, بلاش تاخد أعلى باقة عشان الفرق مش كبير. الحاجات الصغيرة دي بتفرق بعدين صدقني. بلاش تستقل بالارقام القليلة دي عشان بتعد بعد كده.
15. في حاجة اسمها Home sickness. أنا شخصيا مجربتوش بس واضح إنه بيجي لستات كتير أول لما يسيبوا مصر. معرفش إيه سببه بس اعتقد إن حله هو إنك تهيأ نفسك إن كندا مش بلد سهلة و هتتعب في الاول و ممكن تتعب لفترة طويلة نوعا ما.
16. أول ما تلاقي أي شغل امسك فيه حتى لو مش على مزاجك لغاية ما تلاقي حاجة أحسن.
17. معلش هتتعب في المكوى و تنضيف البيت و العربية و الحاجات دي اللي إنت متعودتش تعملها في مصر. انسى الرفاهية بتاعة مصر عشان مش هتنفع هنا لغاية ما تبقى مليونير إن شاء الله.
18. لما تمتحن رخصة السواقة, لازم تعمل حاجة مهمة جدا طول ما إنت ماشي و هي Shoulder Check. البتاعة دي مش موجود منها في مصر بس في كندا بيحبوها قوي. دي اللي لا مؤاخذة بيشوفوا بيها حاجة كده اسمها ال Blind spot. لما تيجي إن شاء الله هيوروهالاك و هتلاقيها اختراع ظريف إن شاء الله.
19. و إنت سايق في الشارع و داخل على تقاطع, متهديش ابوس ايدك. إنت يا اما هتلاقي اشارة (مش عسكري) أو هتلاقي يافطة حمرة اسمها Stop sign. لما تشوف العلامة دي تقف لوحدك كده لغاية ما يجي دورك عشان تعدي التقاطع. ده اختراع ظريف هيعجبك إن شاء الله.
20. هيقولولك كندا كئيبة و مملة و البلد بتنام من بدري بس صدقني لو عايز تعمل أي حاجة في أي وقت, هتلاقي حاجات ممكن تتعمل متأخر بس مفيش نظام المول اللي بيفتح لنص الليل و الكلام ده.
21. وإنت ماشي في الشارع هتلاقي ناس بتبتسم ليك, دي حاجة كويسة و الناس دي مش بتكون عايزة منك حاجة غير إنها بتحييك عشان إنت إنسان طبيعي. أنا عارف إن دي حاجة مش طبيعية بالنسبة ليك بس صدقني دي حاجة عادية جدا. ممكن برضه تحيي الناس بابتسامة بسيطة زيهم و هتلاقي إنها حاجة ظريفة.
22. متقلقش بالنسبة لموضوع الشطافة. اسأل أي مصري تجيب واحدة منين و هتلاقي موديلات كتير و فيه منها سخن و بارد و شغل عالي. متقلقش من الموضوع ده.
23. اكبر غلطة تعملها و إنت في كندا إنك تقارن بين مصر و كندا. الفرق بينهم حوالي كام قرن كده فالمقارنة ظالمة و مالهاش لازمة.
24. توكيل محلات الشاورمة للبنانيين و توكيل الصيدليات للمصريين. مش عارف ليه بس هو كده.
25. لبس مصر التقيل بتاعك ده متجيبوش معاك. أعمل حسابك إنك هتجيب جاكيت محترم من كندا يستحمل لغاية 30 تحت الصفر.
26. هتلاقي ابنك بيسألك هو أنا ليه الوحيد اللي في الفصل بلبس فانلة داخلية, معرفش هترد عليه و تقوله إيه و غالبا دي وسيلة المصريين بيستعملوها عشان يبقوا مميزين بين بقية الناس.
27. طبعا أي مرة تنزل مصر و ترجع هتلاقي نفسك راجع بمنتجات JIL أو قوتونيل معرفش ليه بس واضح إن ده تقليد فرعوني قديم و لسة محافظين عليه لحد دلوقتي.
28. الاتوبيس ليه مواعيد و بيجي في مواعيده مش عارف إزاي و عندك في كذا طريقة عشان تعرف تركب ايه وامتى عشان تروح من أي حتة لأي حتة تانية.
29. إنت محتاج انترنت و حياتك مش هتمشي من غيره. على فكرة السرعات هنا عالية و مفيش الدورية اللي بتطلع عندك في مصر لما تشغل اليوتيوب.
30. طبعا هتتظبط في الضرايب و بلاش تعمل فيها ناصح عشان تتهرب من الضرايب عشان لو اتمسكت مرة, مش هينسوك و هيفتشوا وراك بقية حياتك كل سنة.
31. أنا عارف إن الستات بتحب تجيب حلل و اطباق و حاجات المطبخ معاهم من مصر و هم رايحين كندا. أنا لغاية دلوقتي مش فاهم ليه بس يمكن فيه حنين لمنتجات زهران. جايز برضه.
32. يا عم عارفين إن كندا سقعة في الشتا.
33. مش كل الصحاب جدعان بس هتلاقي صحاب جدعان قوي. حافظ عليهم كويس عشان دول ضهرك في أي وقت و إنت ضهرهم برضه.
34. المصريين اللي في الخليج, موضوع إنك تظبط ورق و تخلع على الخليج لغاية ما تاخد الجنسية اتفقس خلاص. يا تيجي وتقعد زينا يا تاخدها من قصيرها و دور على بلد تانية أحسن تديك بسبور اجنبي غير كندا.
35. كندا هتشيل عيالك على راسها و هتديهم مميزات كويسة بس إنت أعمل حسابك على إنك هيطلع عينك شغل. مفيش شغل بيخلص بالتليفون زي مصر.
36. في الصيف, الدنيا عادي جدا إنها تمطر و المطر مش احتكار لفصل الشتا بس و دي معلومة مهمة خبوها عليك في مصر مش عارف ليه.
37. في فصل الخريف, في ظاهرة طبيعية إنت درستها زمان هتشوفها بعينك و هي سقوط اوراق الشجر. حاجة كده زي ما قال الكتاب و هتتهري و إنت بتلم الورق ده طول الخريف.
38. فيه بط هتلاقيه في البحيرات اللي جوه المدينة اللي إنت عايش فيها, بلاش تفكر في اللي عمله همام في امستردام عشان مش هيحصلك كويس.
39. المصريين في كندا معظمهم شغالين اشغال محترمة. حاول تقدم صورة كويسة عن مصر وإنت في أي مكان شغل و كفاية الفضايح اللي بتعملها مصر كل شوية. مش لازم نأكد للناس هنا إن كل المصريين كده و حاول تفهمهم إن مصر فيها ناس محترمة.
40. احترم كندا و كندا هتحترمك و حافظ عليها و على نظامها و ساعد في تقدمها و بلاش تبص لها على إنها سبوبة. اعتقد إنها بتعاملك كإنسان و دي حاجة غالية قوي مش موجودة في بلاد تانية.
طبعا ده اللي جه على بالي وانا بكتب البوست ده و أكيد فيه حاجات كتير مش على بالي و لو كلمت أي حد تاني ممكن يقولك حاجات تانية خالص بس من الاخر كندا من وجهة نظري بلد محترمة أنا مشفتش منها أي حاجة مش عجباني و موضوع البرد ده الناس عاملة منه قصة كبيرة على الفاضي و هما كام شهر برد و بيعدوا.

5 comments:

  1. مساء الخير
    اولا :اشكر مجهودكم الرائع والنبيل في المنتدى واتمنى دوام التوفيق.
    من فضلك عندي بعض الاسئلة
    ١-اذا قدمت على هجرة وتم قبول طلبي يمكن لي ان اسافر لكندا منفردا وبعد ذلك بفترة سنه مثلا ااخذ زوجتي واطفالي.
    ٢-المبلغ المطلوب مني كفرد واحد تقريبا ١٥ الف دولار هل سيرجع لي منه شيا عندما اصل كندا ولا كل هذا مصاريف هجرة.
    ٣- انا بعمل غير شهادتي ف انا خريج علوم فيزياء وعملت مدرس ٣ سنوات وثم ضابط احتياط بالجيش ثم مدير مبيعات في شركة اكسسوار كومبيوتر وكل عمل كان مدته ٣ سنين ومع شهادات بذلك.
    اسف ع الاطاله وشكرا لوسع صدركم بالقراءة

    ReplyDelete
    Replies
    1. شكرا لمجاملة حضرتك.

      1. ممكن تعمل كده بس أنا شخصيا سافرت مع العائلة الاول عشان ناخد ال Permanent Residence card مع بعض و بعد كده كان ممكن هم يرجعوا مصر وانا اقعد في كندا و ييجوا كندا بعد كده في أي وقت.

      2. مصاريف الهجرة لا ترد بس أي فلوس بتقول إنك هتسافر بيها كندا دي فلوسك و هتفضل على طول معاك و كندا مش هتاخد منها أي حاجة.

      3. اهم حاجة بالنسبة للهجرة هو إن يكون في تأمينات مسجلة ليك في كل عمل و الموقع الرسمي فيه امكانية معرفة إذا كنت تصلح للتقديم على الهجرة أو لأ. الموقع الرسمي هو http://www.cic.gc.ca/english/immigrate/eligibility.asp

      أتمنى إن اجاباتي تكون واضحة و ارحب بأي اسئلة اخري و ربنا يوفقك إن شاء الله

      Delete
  2. اشكرك يا استاذ فادى على اسلوبك الرائع فى الكتابة بس انا عاوزة اهاجر كندا وزوجى بس شروط الهجرة تجيب احباط اصلا واولها 17 الف دولار هههههههه ياريت ترد عليا وتدينى بريق امل وشكرا لك

    ReplyDelete
    Replies
    1. أنا معرفش الشروط قوي بس مظنش إن كندا هتاخد المبلغ ده منك. مصاريف الملف صعب يكون بالرقم ده, بس هم بيكونوا عايزين يضمنوا إن اللي هيهاجر لكندا عنده فلوس تكفيه على الاقل 3 شهور و المبلغ ده مش بيروح لكندا

      ده مبلغ اللي بيقدم على الهجرة بيتعهد إنه يكون معاه لما يسافر عشان يصرف منه لما يوصل كندا لأن كندا مش بتقدم أي خدمات صحية في أول 3 شهور من وصول المهاجر لكندا.

      Delete