Google Analytics

Friday 20 February 2015

المرأة في المجتمعات الذكورية

20 فبراير 2015

البوست ده اعتراف بالخطأ أكتر منه أي حاجة تانية. الموضوع بإختصار هو نظرتي للمرأة و تغير نظرتي لها على مدار السنين اللي فاتت.

هبتدي الموضوع بنظرتي للمرأة من أكتر من عشرين سنة مثلا ايام المدرسة و الكلية. طبعا عشان أنا نشأت في مجتمع ذكوري معفن, كنت مقتنع إن المرأة كائن اضعف من الرجل و اقل منه في كل حاجة و كنت وقتها شايف إن عمل المرأة شيء مش كويس و كنت بقول إنه شيء مش محبب و لو مفيش ضرورة مادية لعمل المرأة, يبقى مالوش لازمة طبعا كان بيأيد تفكيري الجو العام المحيط حوليا اللي فيه كل الناس بتتكلم و بتقول نفس الكلام  ده غير البهدلة اللي أي ست أو بنت كانت بتواجهها في أي مكان من الناس حواليها و كنت شايف إن مالوش لازمة وجع الدماغ ده و الاحسن إن الست تقعد في البيت لو راجل البيت يقدر يكفي البيت من احتياجاته لو اشتغل لوحده.

الصراحة كانت فيه حاجات كتير بتشجعني على التفكير ده خاصة إن اغلب البنات اللي كانوا معانا في الكلية داخلين هندسة غصب و ماكانوش حابين الدراسة فيها و محسيتش إني شفت أي بنت في الكلية تجبرني على احترام عقلها و ده شيء غلط من وجهة نظري عشان أنا أكيد مكنتش أعرف كل البنات عشان احكم عليهم كلهم.

المهم بعد ما خلصت كلية, اشغلت في شركة و حظي الكويس إني اتعرفت على زميلات كتير اجبروني على احترام عقلهم بالاضافة لمراتي اللي أكتر حاجة شدتني ليها هو عقلها و تفكيرها القريب من تفكيري و اكتشفت إن الصورة بتاعة البنت التافهة السطحية صورة غلط و مش حقيقية و بالعكس اكتشفت إن فيه ستات و بنات كتير عندهم عقليات محترمة جدا و ناجحات في كل المجالات مع الأخذ في الاعتبار إن التحديات اللي بتواجههم في المجتمع أكبر أو اعنف بكتير من التحديات اللي بتواجه الراجل.

مع الوقت و التفكير في المواضيع دي, لقيت إن المجتمعات و افكارها اللي بينقلها الناس و الاعلام هي اللي بتشكل شخصيات البشر و عشان كده الصورة بتاعة البنت التافهة هي المسيطرة مع إني شايف إن زي ما فيه بنات تافهه و سطحية, فيه ولاد و رجالة تافهة أكتر الصراحة بس عشان المجتمع ذكوري, فالصورة بتاعة البنت التافهة هي اللي بتثبت في العقل.

أنا شخصيا حاولت ابحث في الموضوع ده و لقيت ان المجتمعات العربية ينطبق عليها مسمي المجتمعات الأبوية (patriarchal societies) اللي فيها الرجل هو اهم شخص في أي كيان موجود في المجتمع, و طبعا اكتشفت إنه فوق إنه مجتمع ذكوري معفن بيحتقر المرأة, فهو مجتمع يحتقر رأي الاصغر في السن و يبجل الكبير دون النظر لعوامل اخري كالخبرة مثلا. قلت يمكن لو بحثنا عن مجتمعات تعلي من قدر المرأة على الرجل, تبقى مجتمعات أحسن و لقيت إن فعلا فيه قبائل و مجتمعات امومية (matriarchal societies) بس لقيت إن المجتمعات دي متخلفة برضه و الست بتقهر الراجل و فيه مجتمعات منها الست ممكن تتجوز أكتر من رجل و ده محلش مشكلة المجتمعات الأبوية اللي موجودة في المنطقة العربية.

الحقيقة إن المجتمعات اللي فيها احترام متبادل بين الرجل و المرأة و تحترم المرأة و تري إن دور المرأة مهم داخل البيت و خارجه في الحياة العامة هي المجتمعات السوية القادرة على التقدم و الحقيقة إني اري إن الرجل يتميز بصفات مهمة و كذلك المرأة و الاتنين بيكملوا بعض و دورهم اساسي في تكوين كيانات متكاملة من أول اصغر كيان زي الأسرة لاكبر كيان زي الدولة.

أنا شخصيا ادعم المرأة في حربها ضد الرجعية و المجتمع الذكوري و أتمنى ان نعامل المرأة كإنسان كما نتعامل مع الرجل و اري إن من يري انه يحافظ على المرأة باعتبارها قطعة حلوي هو في الحقيقة يري نفسه ذبابة.

No comments:

Post a Comment