14 يناير 2015
بوست موجه للعقلاء من المسيحيين اللي مش عاجبهم اللي حصل الفترة اللي فاتت من تصريحات من وجهة نظري محتاجة ادانة و اعتذار من الكنيسة.
بعد تصريح الانبا بولا و حديث ابونا مكاري يونان الاخير, كذا صديق مسيحي جه وكلمني بيعبر عن غضبه من اللي حصل و طبعا أنا حاولت اوصل صوتي لكذا حد ممكن يكون في ايده أي حل بس للاسف كل محاولاتي كانت بتوصل لطريق مسدود مع الناس اللي اتكلمت معاهم لاسباب كتير اهمها ايمانهم الراسخ إن حتى لو رجال الدين بيغلطوا فإن اعتذارهم شيء مستحيل و مواجهتهم بالغلط شيء غير سليم عشان احنا منقدرش نحاسبهم و هم بس اللي ينفع يحاسبوا بعض و لو هم كلهم متفقين على اللي بحصل يبقى ربنا يتصرف معاهم. ده ملخص اللي وصلت ليه مع كذا حد اتكلمت معاه بخصوص اللي حصل في الفترة اللي فاتت.
أنا فعلا معنديش أي كلام جديد اقوله غير إن التفكير ده من الناس المفروض إنها عاقلة و مش راضية على اللي بيحصل بيؤدي لنتايج سيئة هم للاسف مش واخدين بالهم منها عشان حاجة واحدة بس, و هي انهم عايشين جوة منظومة الكنيسة و مش عارفين يبصوا للموضوع من الخارج و مش شايفين إن فيه مشكلة حقيقية و كل اعتقادهم إني أنا حالة فردية لا اعبر عن ناس كتير مش عاجبها اللي بيحصل و سهل قوي يبعدوا عن الدين بسبب الغلط اللي بيحصل ده.
من وجهة نظري محدش هيتحرك من غير ما الناس اللي زيي تعلي صوتها و تقول إنها مش عاجبها اللي بيحصل و يبان إن ناس كتير ضد اللي بيحصل ده. أنا عارف اننا مش متعودين على كده بس صدقوني هو ده الطريق الوحيد عشان صوت الناس اللي زيي يوصل للمسؤولين في الكنيسة و يتحركوا و يحلوا جذور المشاكل اللي موجودة و كلنا شايفينها بس عاملين مش واخدين بالنا إنها موجودة و كأننا تحولنا إلى نعام بيدفن راسه في الرملة.
اخيرا, عايزكم تفتكروا فيلم النوم في العسل و قد إيه الناس كلها كان عندها نفس المشكلة بس كله مش قادر يفتح بقه و بسبب ده, المسؤولين كانوا عايشين في حالة انكار بدورهم و كله ماشي تمام. الفيلم قفل على مشهد مهم و هو إن كل اللي عنده مشكلة فتح بقه و عبر عن مشكلته و بكده اصبح مفيش أي مجال لانكار إن فيه مشكلة حقيقية و على المسؤولين ايجاد حلها.
نصيحتي لأي حد مش عاجبه أي حاجة بتحصل, يرفع صوته بكل ادب و يعبر عن اللي مضايقه و لما يبان إن فيه نسبة مش قليلة مش عاجبها اللي بيحصل, أكيد هيحصل اجراءات من المسؤولين لحل المشاكل الموجودة.
No comments:
Post a Comment