Google Analytics

Wednesday 4 February 2015

مفاهيم خاطئة عند المسيحيين

5 يناير 2015

بوست موجه للمسيحيين و هتكلم بكل صراحة و اللي مش عاجبه الكلام, يا ريت يتناقش معايا في أي وقت و بأي وسيلة يحبها.
طبعا كلنا شايفين إن فيه رجال دين مسيحيين من أول اصغر كهنة للبابا شخصيا مرورا ببعض الأساقفة بقوا بيتكلموا في أمور الحياة و خاصة السياسية بطريقة اصبحت مستفزة جدا.
أنا انطباعي الشخصي إن كل الكلام ده مهما كانت دوافعه, هو خطأ كبير و ده وجهة نظري ونظر ناس كتير مسيحيين أعرفهم, بل أنه مسبب عثرة كبيرة لمجموعة كبيرة من المسيحيين اللي ابتدوا يبعدوا عن الكنيسة بسبب الافعال دي فالموضوع مش سهل أو بسيط خاصة إننا بقينا بـنقعد نتفرج على اهانة الكنيسة كل يوم بسبب أفعال غلط كلنا شايفينها بتحصل باستمرار.
اكبر مشكلة من وجهة نظري هو اعتقاد خاطئ تماما راسخ عند مجموعة كبيرة من المسيحيين اللي قاعدين بيتفرجوا على الغلط و ساكتين عليه و لما بتكلم مع أي حد في هذا الموضوع و هو إننا مينفعش نتكلم على رجال الدين عشان عندهم حكمة الاهية اخدوها لما بقوا رجال دين و حتى لو بيغلطوا, فمينفعش نتكلم معاهم أو نواجههم بالغلط ده عشان هم بس اللي يقدروا يحاسبوا بعض بناء على المناصب بتاعتهم حيث إن لكل شخص من رجال الدين رئيس مسؤول عنه و هو بس اللي ليه الحق يواجهه أو يحاسبه. بمعنى إن الكاهن ليه اسقف يرأسه و إن الأسقف ليه بطريرك يرأسه و البطريرك له رئيس هو اللي هيحاسبه و هو الله, فهنا احنا كمسيحيين مالناش أي دور في الكنيسة و نقعد متفرجين و ربنا هو اللي يتصرف بقى لو فيه حاجة غلط بتحصل.
الكلام ده أنا بصراحة مش عارف مصدره إيه لإنه مش موجود في الانجيل و فيه قصص كتير لرجال دين وقف قدامهم ناس اقل منهم في المنصب لما غلطوا و برضه مفيش أي حاجة بتقول إن رجل الدين بينزل عليه حكمة الاهية لما بيترسم بأي رتبة كهنوتية و كل الافكار دي أفكار كلها أنا اصنفها تحت بند البدع اللي لازم تتغير في اقرب وقت و الوم فيها رجال الدين نفسهم اللي عارفين إن فيه ناس عندها الافكار دي و مش بيغيروها.
مع كل مناقشة مع أي شخص مسيحي مدافع عن الافكار دي, يذكر لي موضوع النفخة المقدسة وكأنها دليل إن الكاهن أو رجل الدين عنده حكمة أكتر من أي شخص تاني و أنا بصراحة قررت إني افهم إيه أصل الموضوع ده و لقيت إن الموضوع ده متاخد من انجيل يوحنا لما السيد المسيح ظهر لتلاميذه بعد القيامة، والأبواب مغلقة عليهم بسبب الخوف:
" ففرح التلاميذ إذ رأوا الرب. فقال لهم يسوع أيضًا سلام لكم. كما أرسلني الآب أرسلكم أنا. ولما قال هذا نفخ، وقال لهم اقبلوا الروح القدس. من غفرتم خطاياه تغفر له. ومن أمسكتم خطاياه أمسكت" (يو 20: 20-23).
و واضح إن الموضوع ده مرتبط بس بالسلطة اللي اداها المسيح للتلاميذ و هي الحل و الربط, و مفيش أي كلام على حكمة الاهية و لا حاجة و عندي من الأمثلة كتير على رجال دين على مر العصور عملوا حاجات غلط و عندي امثلة على رجال دين وقف قدامهم ناس اقل منهم في الرتب و المثالين اللي حاضرين في ذهني هم:
- اثناسيوس الشماس اللي وقف قدام بدعة اريوس اللي كان وقتها برتبة اسقف
- بولس الرسول اللي عنف بطرس لما لقاه بيعمل حاجة غلط و معروف إن بطرس هو اللي المسيح قال له على هذه الصخرة ابني كنيستي وده اشارة إن بطرس كان في مقام أعلى.
برضه من الأخطاء الشائعة هو إن الله بيختار البطريرك و دي حاجة مش عارف مين زرعها في عقول الناس عشان على مر تاريخ الكنيسة من أول القرن الاول حتى يومنا هذا, كل البطاركة كان بيختارهم الناس باستثناء البابا ديمتريوس الاول وحتى هذا البطريرك اخطأ من وجهة نظري لما حرم العلامة اوريجانس لأسباب مش صحيحة (مرجعي كتاب تاريخ الكنيسة للقس منسي يوحنا للّي عايز يراجع).
من وجهة نظري على رجال الدين تصحيح المفاهيم الخاطئة دي للناس و تعليم المسيحيين العقيدة الأرثوذكسية السليمة و ان تعامل الافكار الخاطئة دي معاملة البدع اللي ملهاش أي أساس من الوجود في المسيحية.
للأسف, دور الكنيسة المفروض الحفاظ على الايمان الصحيح و تعليم الناس العقيدة السليمة بس دايما بتيجي أزمنة صعبة بتساعد على دخول أفكار غلط في عقل البشر و دور الكنيسة المهم هو التعليم زي ما المسيح كان كل الناس بتناديه بلقب مهم قوي و هو "المعلم"
الكنيسة مش ماشية صح و على كل إنسان عايز مصلحة الكنيسة إنه يتكلم و يضغط على الكنيسة عشان تبطل الغلط اللي موجود.
ملحوظة مهمة, ناس كتير هتقول إن الانترنت مش مكان للكلام ده و أنا عايز ارد على الكلام ده بإني حاولت اوصل كلامي بطرق مختلفة لناس داخل الكنيسة و لكن لم يتحرك احد, فلم يعد في إمكاني غير بوست حقير يمكن يصل لعدد أكبر من الناس اللي بدورهم ممكن يوصلوا لنتايج أفضل مني.

No comments:

Post a Comment