Google Analytics

Tuesday 3 February 2015

ملخص 2014 مع السيسي

27 ديسمبر 2014

- انزل باستفتاء الدستور الجديد و سمعني سلام أحلى باب للحريات و لازم نقول نعم عشان نخلص من الاخوان.
- يا جدعان إيه علاقة الاخوان بالدستور؟؟
- مالناش فيه, و بعدين ما دام السيسي عاجبه الدستور, يبقى تسلم الايادي و لازم نقول نعم وكلها كام شهر و الدنيا تتصلح 
فقرة راقصة و الدستور يعدي بنسبة من بتوع أيام الزمن الجميل 
-------------------------------------------------------------------------------
- ألف مبروك السيسي بقى مشير ... 
- بس ده مشاركش في أي حرب. 
- مش مهم, السيسي بطل و لو راجل اعترض
-------------------------------------------------------------------------------
- ألف مبروك, عبد العاطي كفتة بقى لواء و هيحول الفيروس لصباع كفتة يغذي المريض عليه. 
- يا عم إيه الكلام الفارغ ده؟
- إنت هتغلط في الجيش ولا إيه يا خاين يللي عايز تهد عمود الخيمة و بعدين استني ل 30 يونيو و هتشوف إن الجيش بيعمل المعجزات. 
-------------------------------------------------------------------------------
- السيسي داخل الانتخابات ولا مش داخل؟
- لازم يبقى الرئيس, مفيش بديل تاني ولا إنت عايز الاخوان يرجعوا تاني؟؟
- يا سيدي مش عايز بس إيه علاقة السيسي برجوع الاخوان؟؟ 
- مالناش دعوة, التليفزيون كله بيقول كده و لازم السيسي يجي و كلها كام شهر و الدنيا تتصلح بس إنت اطلع منها. 
-------------------------------------------------------------------------------
- ألف مبروك السيسي داخل الانتخابات بس مش لاقيين حد ينزل قدامه. 
- لو حمدين مش نازل, هاتوا مرتضى منصور 
- لأ الحمد لله حمدين نازل و عنده برنامج بس متقلقش هنطلعه اخواني و قفلنا برنامج باسم يوسف عشان محدش يقرفنا في الانتخابات. 
- طب و برنامج السيسي؟؟؟
- مفيش برنامج و أي حد يسأل, نرد عليه بأي كلام و دي أسرار قومية مينفعش تتقال في العلن بس كل المشاكل هتتحل حتى بالأمارة هنحل مشكلة البطالة بعربيات خضار لسوق العبور. 
- الحمد لله دي بشرة خير و إن شاء الله كلها كام شهر و الدنيا تتصلح. 
فقرة راقصة تانية و السيسي رئيسي بنسبة تاريخية يا فندم. 
-------------------------------------------------------------------------------
- شفت السيسي بيعمل إيه؟؟
- السيسي رايح للست ببوكيه ورد تحفة و بيقولها حقك علينا. 
- حركة شيك جدا الصراحة بس هو عمل إيه تاني عشان شكلها فرقعة اعلامية. 
- لأ ماهو مش ساكت و بعدين ماهو هيحل مشكلة المواصلات بركوب العجل, إنت مشفتوش وهو راكب العجلة بعد ما قفلوا كل الشوارع عشان يعمل الماراثون اللي كسبه؟
- حاجات جميلة فعلا و تحيا مصر يا فندم. 
-------------------------------------------------------------------------------
- هو مش 30 يونيو عدي؟ إيه أخبار جهاز الكفتة. 
- يا راجل إنت ليه بتدق على الحاجات البسيطة دي, وبعدين الجيش عايز مهلة 6 شهور كمان و بلاش الكلام الهدام بتاعكم ده. 
- طب ادينا مستنيين أهو لغاية آخر السنة وهنشوف. 
- ده جيش مصر اكبر جيش في المنطقة وكلها كام شهر و تشوف مصر هتبقى إيه. 
-------------------------------------------------------------------------------
- الحق بقى المشروع القومي الكبير, السيسي هيعمل قناة جديدة و هيلم 60 مليار من الناس. 
- حاجات جميلة عشان الناس تحس إنها مشاركة في مشروع قومي. 
- اوعى وشك و بعدين السيسي ضغط على مدير المشروع و قاله المشروع يخلص في سنة مش تلاتة عشان الحفر كله على الناشف. 
- على الناشف؟؟ هو مش عارف انه بيحفر جنب قناة السويس؟
- يا عم إنت إيه اللي دخلك في الحاجات دي, السيسي فاهم كل حاجة. 
بعد كام أسبوع .... مرحلة الحفر على الناشف انتهت و الحمد لله طلعنا مية و دي بشرة خير. 
-------------------------------------------------------------------------------
- السيسي رايح الأمم المتحدة يلقي خطاب هناك.
- إيه رأيك في الخطاب بتاعه لما قال "تحيا مصر" و القاعة اترجت من التسقيف؟
- حاجات جميلة قوي فعلا بس إيه رأيك في اللقاء اللي عمله مع التلفيزيون الأمريكي اللي قال فيه إن مصر حليف لامريكا و واقفين معاهم بس ادونا الاباتشي عشان نحارب الارهاب. 
- أنا معرفش أي حاجة عن الكلام ده. أنا متابع عمرو اديب و الراجل عامل شغل هايل قوي في التغطية الاعلامية الصراحة و تحيا مصر 
-------------------------------------------------------------------------------
- مصر بتحارب الارهاب و عاملين شغل جامد قوي في سينا و مبهدلين الارهابيين هناك.
- فعلا, إنت تعرف أي حد من هناك يؤكد الكلام ده؟
- لأ بس جيش مصر عمره ما يكدب أبدا. 
- بأمارة جهاز الكفتة؟؟
- أنت شكلك مش فاهم حاجة و جيش مصر اعظم جيش في المنطقة العربية. 
بعد كام يوم.... حادث ارهابي في كرم القراديس و استشهاد 26 من القوات المسلحة
-------------------------------------------------------------------------------
- ألف مبروك يا جدعان, مبارك اخد براءة هو و كل اللي معاه. 
- قضاء شامخ بصراحة طب إيه رأي السيسي؟
- لا تعليق على احكام القضاء بس سمعنا إن السيسي بيشتكي من تركة مبارك. 
- يا راجل, هو مش قال إن مصر أم الدنيا و هتبقى قد الدنيا؟؟ و قال إيه كمان؟
- قال إن ربنا اختاره عشان يبقى رئيس مصر. 
- فعلا؟؟ دي حاجات جميلة جدا فعلا. أكيد ربنا بعته عشان يطلع العفاريت و الجن اللي ريهام سعيد بتجيبهم في حلقاتها.
- لأ الجن و العفاريت دي معمولة عشان نغلوش على تسريبات مكتب السيسي اللي ممدوح شاهين بيقول انهم متعودين على تزوير الأوراق الرسمية من أيام المجلس العسكري. 
- أنا كده اطمنت الحمد لله. مصر أكيد على الطريق الصحيح الا إيه أخبار جهاز الكفتة صحيح؟؟ الست شهور خلصوا. 
- جهاز إيه يا راجل, إنت لسة فاكر بس عامة الجيش عايز ست شهور كمان يعمل تجارب أكتر. 
- ألف مبروك فعلا, كانت سنة جميلة و ممتعة مع السيسي. 
- إنت هتتريق؟ اصبر شوية و كلها كام شهر و الدنيا تتصلح ولا إنت عندك شك؟
- .....................

No comments:

Post a Comment